【now.com財經】噚日晨咁早連我家肥貓毛都未梳就同我家老爺兩個橫跨一個香港入去迪迪尼，兩個老人家除咗入去玩之外，目的就係睇港隊同米老鼠花車巡遊(我愛謝影雪)。
好在所有嘢都偏早開始同玩完，而且上年同我家老爺都睇咗爆城堡煙花，所以喺下午第二次巡遊完之後都閃人，如果唔係今日都起唔到身(雖然依家都仲係好眼瞓)。
同身邊嘅人一齊製造一啲回憶係需要啲「勇氣」，一入園先去冰雪嗰位玩咗嗰兩個充滿離心力嘅機動遊戲(形態上佢確實唔係一個過山車)之後，我得返半條人命再去到排隊玩傘兵時，我忍唔住同我家老爺講：我終於都諗到有樣嘢係難過瘋狂操Swing Trade盤，就係一連三個離心力遊戲(唉~姨姨向來都係唔得，我老媽今年第一年拎住樂悠卡仲玩緊「洗衣機」)
我都係做返自己比較撚手嘅嘢算。恒指今朝開市跌126點，報17,862點。到依家只係開咗市五分鐘，作戰室喺9點半之前Plan定出淡倉，到依家開咗市9分鐘，指數跌幅已經擴大至跌228點，報17,760四點，不過牛證第一層喺17,600至17,699點，唔望佢會落到呢個位開餐，因為重點係我哋開餐嘛。
10點未到其實見小時圖裂口向下過咗條10線之後穿過條20線，Slow STC(14.3)兩線上個星期五已經觸咗頂向下中，再落嘅話50線可以做下一個下望目標，皆因目前整條保歷加通道橫行中，Swing Trade真係做得到。
不過，考慮返五分鐘圖Slow STC(14.3)觸底，淡倉想望小時圖50線的話，一係本身晨早淡倉在手，一係等返五分鐘圖嘅Slow STC(14.3)兩線上返超買位先至出動穩陣。
恒指熊(68447)，收回價18,228點，同現價有逾400點距離，槓桿有約36.3倍，同一收回價中最高。
如果捉依家五分鐘圖Slow STC(14.3)捉底向上走而出好倉嘅話，恒指牛(68070)，收回價17,368點，同現價都係約400點左右，槓桿有約42.3倍都夠架啦。
就嚟10點，用小時圖Trade嘅話，Lock住20線做上方量度線，下望50線亦都係另一個玩法。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
