【Now財經台】蔚來(09866)會喺今日(5日)收市後出業績，睇返《彭博》綜合市場預測，雖然交付量、收入及毛利率全部有增長，但估計仍要蝕錢，早前，蔚來公布第2季交付量逾5.7萬部，按年大增逾1倍，即將派發嘅業績係咪值得憧憬？
艾德金融執行董事陳政深指，交付量大增因素股價已經反映咗，因為呢啲數據每個月都會公佈，市場最關注係公司嘅可持續性，即是有冇足夠資金繼續營運業務，其次係公司未來競爭力，足唔足以維持交付量，同埋幾時可以扭虧為盈。
Ryan指，睇返蔚來近3個月嘅交付數據，只係勉強維持到，冇再增長，加上早前內地車市爆發減價戰，蠶食整個市場，蔚來呢類中價車企必定首當其衝。
