【Now財經台】據澳門媒體報道，澳門7月至8月旅客人次逾668萬，已回復至2019年同期約93%，不過，7月至8月賭收僅回復至疫前79%水平，按年僅升13%，係咪旺丁唔旺財？嚟緊嘅「十一黃金周」可唔可以刺激賭收？
耀才證券研究部總監植耀輝指，內地客佔澳門整體旅客總數60%至70%，隨著消費意欲下降，旅客去澳門旅遊都未必會入賭場玩，賭收數字要回復至疫前水平有一定難度，相信短期好難扭轉呢個局面。
賭股方面，Stanley認為，大市氣氛差，即使賭股有好消息，股價都好難炒得起，亦唔好過分憧憬「十一黃金周」因素，因為未必可以帶挈賭股，如果想短炒，可以考慮銀河娛樂(00027)，當股價升到30元樓上，可以考慮先行食糊離場。
