【Now財經台】獲納入「港股通」後嘅阿里巴巴(09988)有北水支持，股價上周一度逼近85元水平，升至5月中以來高位，不過，似乎有唔少投資者食糊，股價今日(16日)回套，一度低見81.4元，跌1.6%。資金流方面，上周五(13日)係最多資金流出個股，好倉流出約4600萬元，今朝資金係咪仍然以流出較多？
瑞銀亞洲股票衍生產品銷售部李梓維指，早前市場已部署阿里獲納入「港股通」，正式成為「新貴」後，股價都顯著上升，但未能升穿前高位，上周五升至84.6元水平就無以為繼，近日資金主要部署淡倉為主，並揀熊證多過PUT輪，熊證收回價集中喺85元至87元，收回價87元係資金最關注嘅條款。
