【Now財經台】紅星美凱龍(01528)股價今朝(26日)輕微高開後，愈升愈有，最終以全日高位1.59元收市，勁升逾21%，成交金額3000萬元，較過去100日同時段平均成交大增17倍。
內房冇起色，做家居裝飾嘅紅星美凱龍都受拖累，由於消費信心仍未完全恢復，集團上半年收入大減25%，更轉蝕13億人仔，股價亦由2021年中高位近6元，一度跌至月初約1元。
中央連日出招救市，政治局會議又話要促進樓市止跌回穩，如果內房銷售回暖，紅星美凱龍未來業績或有機會自谷底回升，紅星美凱龍股價今年累跌28%，相比內房及相關家具、地產代理股，月初已開始反彈，紅星美凱龍嘅反彈係嚟得較遲，暫時可先上望250天線，即1.77元水平。
