【Now財經台】中央今次傾力救市，唔少市場人士，甚至著名外國投資者都話估佢唔到，因為力度超乎想像，亦反映咗救市嘅決心，更帶挈「港股大時代」重臨，幾乎冇股份唔升，科技、內房及券商股等更升到飛天，散戶大有斬獲，去證券行開戶炒股嘅人更大排長龍。
除咗老散，企業管理層都吼準呢個難得嘅機會，趁公司股價飛升減磅賺返轉，其中，龍湖集團(00960)主席陳序平周三(2日)喺場內減持100萬股，套現近2000萬元。此外，美團(03690)聯合創始人穆榮均幾日前都減持公司股份，套現逾3億元。
消息傳出後，兩隻股份今朝(4日)都要跌，龍湖一度跌4%，低見16.3元，美團曾挫近4%，低見197.3元，失咗「雙紅底」。
