【Now財經台】截至早上11時止，1小時內《彭博》用戶搜尋量最多港股，依次為華潤萬象生活(01209)、阿里健康(00241)、中國人壽(02628)、華虹半導體(01347)及龍湖集團(00960)。
港股今朝(8日)大跌市，幾乎所有股份都錄雙位數跌幅，而今日上榜呢5隻股份，就係來自近期最強勢嘅板塊，有邊隻可以趁今日大幅回套執平貨？
元宇證券基金投資總監林嘉麒指，港股及A股近期升勢都係靠消息和氣氛推動，修復返較低估值，喺依家大市出現較明顯嘅調整，以及獲利盤湧現下，揀股就要揀基本面嚟緊會繼續受惠於大環境、投資氣氛，佢建議可以考慮國壽，因為A股氣氛一定係好轉，成個市場嘅投資回報應該會更直接，同埋更明顯影響國壽未來嘅業績表現及盈利，雖然國壽股價已經自低位回升咗約1倍，現價已自高位調整咗唔少，若短線落到10天線水平或以下，出現健康調整，反而係一個中長線吸納機會。
