【Now財經台】內地股市9月底開始「坐過山車」，A股狂牛衝高後再腳軟，呢個情況不斷Loop，當日中央祭救市「組合拳」時，滬深股市炒到癲，其中，滬深300指數短短5個交易日炒高25%。不過，呢種「瘋牛」情況再睇唔到，換嚟係散戶「投降」撤退。
據《彭博》報道，「關閉證券帳戶」呢個字眼，10月9日喺微信出現咗5600萬次，睇返嗰日A股市況，喺獲利盤湧現及市場質疑大規模刺激幾時出現下，滬深300指數大插7%。
另一個股民「撤退」線索係來自工商銀行(01398)嘅數據，由證券帳戶轉錢去儲蓄帳戶嘅情況顯著增加。
值得留意係，雖然內地多個部委今朝(17日)再開記招，公布最新撐樓市招數，但A股幾大指數出奇地冷靜。
