【Now財經台】自2021年以嚟，內地家庭多咗8萬億人仔超額存款，摩根大通表示，人民銀行加大減息力度係鼓勵居民將超額存額流入股市追求回報，喺內地依家嘅政策下，摩通睇好招商銀行(03968)，摩根士丹利就睇好郵儲銀行(01658)，投資者應該點揀好？
博威環球證券金融首席分析師聶振邦認為，雖然兩家美資大行睇好招行及郵儲行，但投資者揀股要考慮返係短線，還是中長線投資。如果係短線投資，招行股價反應會比較快，升幅亦會大過其他內銀，但值得留意係，招行股價喺10月9日開始，股價持續橫行，未見出現明顯反彈，如果想買招行，聶Sir建議喺38至39元入手。
郵儲行方面，聶Sir話股價相對行得慢啲，但勝在股息率高，依家有約6厘，作為中長線投資有一定吸引力，但如果投資者想博6.5厘以上股息率，就要郵儲行股價再跌，建議喺4.3元或以下入手。
