【now.com財經】望住個月曆，仲有大約10個星期到就完2024年，不過出面下晝都仲有成3X度；懷疑香港係咪已經無咗冬天之際，噚晚忽然秋風起。今日再睇下個月曆，哦~原來今日係「霜降」，睇嚟都係時候著返件薄外套先出街。
恒指9月中火熱到10月頭之後，都開始涼咗兩個星期，噚日出現咗短期「死亡交叉」後，依家未完U嘅，不過見住期貨由升過百點到依家縮到升1X點，keep住小幅下行，怪不得呢兩日牛熊兩邊都有街貨流入。
指數今朝升廿零點開市之後，第一粒燭一落一上高低位見過117點之後，指數向上直奔過20,600點樓上，依家9點50分，指數升126點，報20,622點，數值上暫時上破咗小時圖嘅10線，作戰室晨早好倉追緊。
後本來望住小時圖條50線過唔過到，但10點搭正即過，作戰室好倉再追出，博嘅都只係繼續借小時圖嘅Swing Trade繼續上，知道保歷加通道口係收窄中，所以都係且戰且走嘅方法去做。
恒指牛(56743)，收回價20,127點，同現價有約422點距離，有約40.3倍槓桿，低街貨。
依家10點5分，指數已經將第一層熊證街貨全數收回，量唔多但叫做爬到入街貨層；借五分鐘圖依家入嘅話一定要有滿滿嘅勇氣，進取嘅，見到平均線有踩好先出可以，保歷加通道口仍然拓闊中，但相信過一陣底線向上就會將條保歷加變成整條向上行，到時再借線出亦可以，安全啲無壞嘅。
跟進返噚日揀嘅SPDR金ETF(02840)，噚日借咗小時圖嘅10線而出咗隻S金Call(24748)，平均買入價為0.182元。
今朝(02840)開市升6.5元，報1,970元。粒燭嘅擺位亦都見高於10線以上水平，再望望隻(24748)，於9點54分見輪證做緊0.188元，暫時有6格袋住先。
講明，(24748)係無得玩Day Trade，咁都過咗一晚夜啦，依家有6格落袋都叫正數，小時圖嘅保歷加通道口有見收窄，Swing Trade有得保持嘅。keep住用10線作為量度線可以，但如果見有正數可以落袋嘅，袋咗先隨得你。
自己注貨自己數，唔駛同人比，根本都唔係比賽，正數就得啦！
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
