【Now財經台】截至早上10時45分止，1小時內《彭博》搜尋量最多港股，依次為周大福(01929)、華潤飲料(02406)、美團(03690)、小米集團(01810)及中國聯通(00762)。
周大福第2季零售值大跌21%，跌幅大過同業六福集團(00590)，不過，同店銷售跌幅就冇咁大，金飾銷售大跌近25%至36%，對應返今年金價30%嘅升幅，金飾跌幅都符合金價走勢，但股價喺業績後都有得升，一度大升10%，點解會升得咁靚？
資深證券分析師彭偉新指，依家嘅問題係金價升得太急，都擔心會有「摸頂」嘅情況，加上市場唱好金價，冇增加市場買金需求，反而令唔少人買金意欲細咗，令周大福受嘅負面影響更大。
佢又話，周大福股價今日(23日)走強，相信同公司指整體關舖率未來幾季將會減慢有關，反映行業經過整合後逐步有回穩，但基於各種利淡因素，金飾股升勢未來可唔可以持續，宜睇得審慎啲。
