【Now財經台】截至早上11時止，過去1小時內《彭博》用戶搜尋量最多港股，依次為中國鋁業(02600)、信義光能(00968)、華潤電力(00836)、小米集團(01810)及地平線機器人(09660)。
鋁業股今日(25日)喺基本金屬當中特別弱，有大行提過擔心供應擴張，導致鋁價跌，但又有分析睇好水力發展會提升鋁嘅需求，鋁價未來會點走？中鋁下周二(29日)會派季度成績表，鋁價上季升勢持續，中鋁盈利係咪值得憧憬？
大華繼顯執行董事梁偉源表示，鋁價唔同金價或銅價會明顯受單一因素影響，其實有唔少因素都可以影響鋁嘅供應及需求，鋁價近排比較牛皮，喺每噸2500至2700美元水平徘徊，所以鋁業股嘅股價近期都變化唔大。
業績方面，Steven認為，中鋁未必可以維持到第2季嘅表現，而喺近期鋁價走勢平平下，相信中鋁股價仍會持續牛皮一陣，暫時唔會出現太大突破。
