【Now財經台】莎莎國際(00178)今日(14日)中午派咗中期成績表，集團半年少賺68%至約3200萬元，期內，收入跌10%，但恢復派中期息，每股0.75仙，毛利率按年跌1.7個百分點至39.4%，不過，集團話第2季毛利率已改善至40.1%。莎莎股價升幅喺放榜後僅略為擴大，市場係咪都預咗呢份業績唔會太好？
耀才證券研究部總監植耀輝指，市場仍對零售業前景睇得較悲觀，一般嚟講，業績後股份嘅成交會比較大，但莎莎就唔算多，股價亦唔係太波動，反映市場對莎莎冇乜興趣。
佢又指，莎莎喺內地發展多年，但營業額仍未有起色，仲要蝕錢，仍然係主要收入來源嘅港澳市場亦蝕緊錢，雖然東南亞市場有增長，但發展業務期間會有唔少營銷開支，因此，未來要留意莎莎有冇辦法推高營業額。
