【Now財經台】金山雲(03896)受長期資產減值影響，上季蝕逾10億人仔，不過，經調整EBITDA扭虧，EBITDA利潤率9.8%，去年同期係負2.8%，毛利率亦有得升，但金山雲要大數都扭虧係咪仍要一段時間？
南華金融集團副總裁莫灝楠指，大數要扭虧的確需時，業務之中包括網絡安全，喺人工智能(AI)年代需求係會增加，但係一定要搵金山雲做係另一件事，所以未必係第一手網絡安全服務提供者，見到毛利率都唔高，因為都有唔少競爭對手。
佢亦認為，今次經調整EBITDA扭虧唔出奇，因為同小米集團(01810)等機構簽訂協議，令到銷量增加。但EBITDA利潤率只得9%至10%，反映喺行內競爭力唔高，所以大數要扭虧就需時。另一方面，公司競爭力喺邊啲位置要提升，以及規模效應要再起，整體EBITDA利潤率先可以升上去。
