【Now財經台】截至早上11時止，過去1小時內《彭博》用戶搜尋量最多港股，依次為平安好醫生(01833)，普拉達(01913)、康方生物(09926)、建設銀行(00939)、藥明生物(02269)。
平醫今日(6日)除淨，公司之前宣布可「以股代息」，股價一度抽升逾24%，市場猜測持股逾39%嘅中國平安(02318)會因今次收特別息觸發全面收購，但仍要等明年1月24日正式派息時，先知道平保收錢還是收股，如果大股東選擇「以股代息」，當中有咩盤算？
大華繼顯執行董事梁偉源指，如果大股東揀股唔揀錢，純粹係一個技術性因素，要按例提全面收購，但相信收購價未必吸引，因為相對每股資產淨值(NAV)有一定距離，而小股東接受全面收購亦冇乜著數，但值得留意係，大股東透過今次「以股代息」，變相增持約2%股權，但又唔使自己出錢，呢個可能先至係大股東真正嘅考慮。
Steven又指，雖然股價由高位跌咗落嚟，平之餘亦幾吸引，但全面收購涉及好大筆資金，所以平保未必想喺呢個時候做呢件事。
