【Now財經台】仲有1個月多少少，特朗普(Donald Trump)就「回歸」白宮，佢之前提出唔同嘅政策部署，最具爭議性亦係全球焦點一定係佢嘅關稅政策，現屆拜登(Joe Biden)政府喺臨走前，繼續炮轟特朗普嘅關稅政策，最新除咗拜登親自「發炮」，財長耶倫(Janet Yellen)亦嚟個「助攻」。
拜登警告，除咗關稅政策，如果特朗普真係減富人稅、削社福開支、撤基礎設施投資，可能會破壞美國經濟成果。佢又指，一旦美國放棄自由貿易，就會令競爭對手有機可乘，喺全球秩序方面扮演更重要角色，更直指特朗普呢啲做法係超錯。
耶倫就話，特朗普嘅關稅政策或會令之前遏通脹工作前功盡廢，又警告美國人可能因為咁要捱貴貨，亦會對依賴進口貨嘅企業造成唔少成本壓力，繼而削弱某啲產業競爭力，完全對經濟冇益。
