【Now財經台】港產人工智能(AI)「獨角獸」商湯(00020)計劃配股集資，配股價1.5元，較昨日(10日)收市價折讓逾6%，集資近28億元，雖然商湯股價今日(11日)向下，但仍守得住配股價，公司話今次集資主要用嚟支持核心業務發展，並用作一般營運資金。其實公司今年6月都配過股，兩次加埋合共淨籌近50億元，如果未來股價再炒高，市況又配合，商湯會唔會再「抽水」？
元宇證券基金投資總監林嘉麒指，科技公司資金需求一般較大，尤其係AI產業，今次配股較多係國家基金，唔少基金嘅成立目的都係支持相關行業，所以今次配股唔止可以畀商湯攞到資金，仲可以比到貨基金去投資，其實呢個情況喺其他行業都有可能發生，例如基建產業。佢又話，當市場氣氛向好，股價再炒高時，商湯再配股集資係有可能。
