【Now財經台】內需股今日(12日)造好，攜程集團(09961)繼續跑出，午後一度升5.5%，報592.5元，集團第3季業績唔錯，按年多賺48%，收入增速加快，展望明年，旅遊需求支唔支持到繼續強勁增長？旅遊股長線應該點部署？
耀才證券研究部總監植耀輝指，市場憧憬中央經濟工作會議有新措施，今日唔止內需股，整體消費股都向上，攜程跑出主要有2個原因，首先係業績對辦，所以股價放榜後可以造好，其次係近期唔同國家都推出旅遊免簽證，可以增加消費者旅遊意欲。
佢又話，由於市民外遊意欲仍大，相信相關行業會繼續受惠，今年行業增長強勁，但之後keep唔keep到都會受其他外在因素影響，但睇返行業現時嘅特性，呢個增長趨勢仲可以保持，所以攜程長線仍值得憧憬。
