【Now財經台】內險股今日(13日)受壓，其中，中國平安(02318)股價顯著回套，一度跌3%，低見46.25元，失守10天及50天線，熱門牛證嘅條款都比較保守，距離收回價20%至60%，槓桿2倍至5倍，CALL輪就距離收回價30%，雖然比較短身，但槓桿有6倍至8倍，係咪代表依家係反手部署好倉嘅好時機？
星展香港環球金融市場上市產品策略師鍾宛婷指，見到有資金流入平保好倉博反彈，因為平保股價今日曾跟大市跌逾3%，短線而言，如果睇槓桿揀產品，細價CALL會比牛證可取。
佢又話，雖然平保基本面冇乜驚喜，但可以繼續憧憬未來會減息或降準，內險股或可受惠於流動性帶來嘅利好，繼而令市場投資情緒好轉，如果博有政策扶持令股價短線有反彈，可以揀價外少少嘅CALL，行使價70元，槓桿8倍。
