【Now財經台】新鴻基地產(00016)股價今早(19日)一度跌近3%，低見71.8元，成交量較過去1個月同時段增約1倍。
睇返技術走勢，新地股價今日已失守保歷加通道，相對強弱指數(RSI)落到26水平，係最超賣藍籌，新地係地產股，一定對息口敏感，美國明年好大機會放慢減息步伐，都預咗股價有較大反應，其實新地股價月初已開始跌，自近期高位80元水平，累計回落10%，表現跟同業恒基地產(00012)、長實集團(01113)差唔多。
新地股價今日落到71.8元嘅近3個月低位，亦接近上半年郭老太鄺肖卿出手增持嘅價位，郭老太曾經喺6月，以每股平均價約70元增持，至7月初再出手，當時每股平均價約66元，每次郭老太出手，市場好多時都解讀為新地股價「告急」，而郭老太增持後，新地股價之後反覆回升，所以未來要留意郭老太會唔會及幾時出手。
