【Now財經台】市傳內地電動車電池製造商龍頭寧德時代，正研究明年來港第二上市，集資最少50億美元，折合約390億港元，寧德時代股價今年強勢，至今累升近70%，反觀同業贛鋒鋰業(01772)及天齊鋰業(09696)股價及盈利表現就強差人意，同樣係鋰業股，點解表現相差咁遠？
艾德金融執行董事陳政深指，業務定位方面，寧德時代同贛鋒、天齊唔同，贛鋒及天齊偏向做上游原材料業務，寧德時代較多涉獵中下游業務，例如生產鋰電池及整個電池模組，呢啲產品市佔率較高，所以叫價能力高，可以反過嚟壓榨返上游成本。
業績方面，Ryan續指，現時鋰價較低會對寧德時代有利，不過，一旦鋰價上返去都唔係壞事，因為寧德時代市佔率本來已經好高，加上成本轉嫁能力高，面對上游及下游嘅議價能力都幾高，可謂進可攻退可守。
