【Now財經台】中芯國際(00981)股價近日抽升，今日(27日)更成功突破30元關口，一度迫近32元，衝上逾2個月高位。高盛曾估計，中芯每股盈利增長持續溫和，對毛利率睇法亦較保守，預期未來幾季都喺20%以下，雖然中芯本身有價格優勢，但未來要面對再降價問題，對集團毛利率會唔會有好大影響？
紅蟻資本投資總監李澤銘估計，中芯毛利率大致可以保持平穩，公司一向追求市場規模及收入增長，只要逐步提升返產能利用率，維持90%至120%水平，毛利率就會有保障。
Alan又指，中芯毛利率曾經逾30%，但呢個係疫情期間芯片斷供所造成嘅異常現象，喺正常情況下，毛利率保持20%以下，市場仍可以接受，依家內地投資者更睇重芯片企業收入增速，如果以價格戰線逐步取代同業，市佔率未來會有上升空間，至於整體市場規模就要睇未來1年人工智能(AI)、工業自動化或人型機械人嘅發展速度，若符合市場預期，整體市場規模會有所增加。
