【Now財經台】恒指公司季檢結果將會喺2月21日出爐，雖然距離依家仲有超過1個月，但大行「估新貴遊戲」已經開始咗，其中，中金搶閘講咗佢哋嘅心水股。值得留意係，睇返過去嘅季檢，大熱倒灶嘅情況都好常見，所以散戶們如果偷步炒「染藍」主題就要轉身快。
恒指成分股方面，中金心水包括有「吸金王」Labubu加持嘅泡泡瑪特(09992)、蔚來(09866)、京東物流(02618)、太古地產(01972)及信達生物(01801)等，都有機會「染藍」。
值得留意係，京東物流及信達生物喺過去幾次季檢最終大熱倒灶，中金都特別講咗幾句解釋下，話主要受一啲作為指數諮詢委員會決策依據嘅因素影響，包括行業及上市地位代表性，亦唔排除仲有其他因素。
中金又估計，上市唔係好耐嘅毛戈平(01318)及貝殼(02423)等，合共24隻股份，有機會納入港股通名單。
