【Now財經台】比亞迪電子(00285)股價今日(6日)輕微高開後，走勢平穩，其後傳出同系比亞迪股份(01211)將於下周一(10日)舉行智能化戰略發布會，消息一出，資金喺下晝大舉湧入，比電股價最多升20%，高見54元，衝上近4年高，收市報53.75，勁升逾19%，成交股數較過去100日平均增2倍。
比電除咗消費電子業務外，另一項主營業務係汽車業務，如果可以受惠於母公司比亞迪「天神之眼」智駕業務，比電業績或會迎來爆發性增長。
早前，有中資券商估計，比電業務喺人工智能(AI)算力需求增加下，「數據中心+機器人」概念會成為下一個增長亮點，集多個當炒概念於一身，難怪今日升得咁誇張。
睇返技術走勢，比電今日喺大成交下抽升，相對強弱指數(RSI)升至80水平嘅極超買水平，仲一舉升穿近幾年高位，技術上肯定升到過晒龍，但由於基本因素或出現重大改變，要留意未來會唔會有重新評級嘅機會。
