【Now財經台】快手(01024)股價今日(13日)喺大成交配合下大幅抽升，午後一度勁升近16%，快手股價今日咁強勢，會唔會同集團今年「新春團購節」商品交易總額(GMV)按年大升1.17倍，以及新線城市日均支付用戶按季大增2.34倍有關？
耀才證券研究部總監植耀輝認為，快手今日好大機會係追落後，雖然科技股近排輪流炒，但快手股價表現長期落後。佢又估計，股價升得咁勁，除咗同GMV數據有關，快手沽空量回落至單位數亦係其中1個原因。
Stanley又指，快手嘅每日活躍用戶數量可以keep到一定水平，用戶黏性比較高，不過，如果公司想用戶轉化成收入或盈利，就要視乎平台直播帶貨情況，如果每戶收入有所提升，對於估值會有頗大幫助。
