【Now財經台】耐世特(01316)股價今日(14日)高開逾2%後，升幅一度擴大至升近12%，高見5.53元，升上逾1年高位，暫時成交股數較過去100日同時段平均增4倍。
耐世特主要做汽車先進轉向及動力系統業務，全球車廠客戶逾60個，喺汽車自動駕駛日趨普及下，公司主要產品電動助力轉向(EPS)需求會愈來愈大。
美銀證券近日發報告，比亞迪股份(01211)日前公布智能駕駛戰略，除咗20萬人仔嘅車款外，中低價車款都會配備智駕系統，相信耐世特可以受惠，該行將耐世特評級由「跑輸大市」調高至「買入」，目標價亦上調至6.4元。
今個月初開始有資金湧入耐世特，由3元水平升至最新5元樓上，但其實距離高位仲好遠，耐世特股價喺4元水平打咗底差唔多3年，今個月喺大成交下出現突破，下一站先睇6元，若升到呢個位兼企得穩，可以再上望7.5元水平。
