【Now財經台】內險股業績期殺到，下周三(19日)會由中國平安(02318)打頭陣，中國人壽(02628)、新華保險(01336)、中國人民保險集團(01339)及中國太保(02601)，今年1月已排隊發盈喜，多家大行都將焦點轉移至派息，滙豐證券指，要觀望險企派息政策有冇改善，摩根大通就估計，雖然內險盈利大升，但派息唔會有太大驚喜，高盛甚至估計派息比率會下降，但下調幅度唔會大過預期，點睇內險派息情況？業績期內有邊隻內險值得買入？
紅蟻資本投資總監李澤銘認為，市場未必會太著重內險派息，始終同內銀唔同，銀行現金流及盈收都非常穩定，每年變動都只係單位數，反觀險企波動性較大，如果盈利唔穩定，派息自然唔穩定。
佢又話，唔少險企本身都唔係派高息，所以市場都唔會有太高期望，所以最終派息會好過預期少少，還是差過預期少少都唔會對股價有太大影響。
Alan又話，新華保險業績增長較大，主要係集團屬財險類，現金流壓力較小，派息比率亦較高，不過，如果要搵有升值潛力嘅內險股，佢建議揀返傳統類型如國壽及平保。
