【Now財經台】本港2月零售業銷貨額按年大跌13%，已經連跌12個月，業界都叫苦連天，但IP(知識產權)經濟似乎例外。
來自日本嘅Chiikawa喺香港第1間官方Pop-up，今個月初至27日喺尖沙咀海港城開放，會分段開售21款經典Chiikawa，人潮迫爆海港城，甚至通宵排隊，期間更爆發衝突，有人要報警，有傳媒問排隊人士想買乜嘢，竟然有人答嚟買Labubu，搞到主辦方喺facebook出Po呼籲市民唔好再去排，最新更取消未來嘅即日籌安排。
Chiikawa fans外，亦有唔少排隊人士趁機「發Chiikawa財」，希望搶到呢批Chiikawa再以炒價放售，其實呢個情況喺好多熱爆IP產品身上好普遍，令呢啲IP產品成為零售市道一班「奇兵」，所以近年唔少地區或企業都大搞IP經濟。
另一個「奇兵」泡泡瑪特(POPMART)(09992)，昨日(14日)宣布啟動全球組織架構全面升級，計劃喺歐美等設區域總部，帶挈股價昨日升逾6%。此外，市傳公司「吸金王」Labubu月底就會出第3代，雖然集團仲未有正式公布，但網上有聲稱已可以代購嘅Po，網民似乎未有考慮風險，已吸引大量查詢，甚至落訂，希望第一時間搶到Labubu 3.0。
