【Now財經台】全球最大型車展「上海國際車展」今日(23日)開幕，小鵬汽車(09868)新車、外國車廠Audi跟上汽集團聯手開發嘅E5 Sportback都有亮相，車股可唔可以食住車展嘅氣氛延續強勢？
南華金融集團副總裁莫灝楠認為，車股純粹借市場氣氛彈起，唔少新車會喺車展亮相，氣氛上會對車股有幫助，觀感上一定會好咗，但對業績增長影響好微，情況就好似小米集團(01810)出新手機一樣，集團係用一個「機海戰術」，但唔為因為1個新model帶動成個集團業績，汽車業情況都係一樣，推好多新車出嚟，但其實係「換湯唔換藥」，所以出咗新車後，毛利率亦唔會特別高。
小鵬方面，Casper認為，公司今年終於達至收支平衡，終於有少少錢賺，集團近期銷售理想，性價比非常高，但唔會對公司毛利率有太大憧憬，去年約14%，要趕上比亞迪股份(01211)嘅逾20%，相信有一定難度，公司出新車係eye catching，但市值達1500億元，係呢個水平股價係有啲貴，短線可能因呢啲消息炒上。
