【Now財經台】Tesla日前派咗一份「災難季績」，今年第1季收入按年跌9%，純利更大跌71%，有調查指，近半美國人唔鍾意馬斯克(Elon Musk)及Tesla，對集團前景係咪好影響？
資深經濟師羅家聰指，市場原本憧憬馬斯克入政府做嘢可以獲得更多消息，有利Tesla業務發展，但依家睇嚟冇乜正面影響，而汽車業亦係關稅戰「風眼」之一，尤其Tesla喺中國有好多業務，其他國家都有好多車出口同佢競爭，所以依家有唔少不利因素，雖然Tesla唔止賣車，但其他業務未必可以直接帶動股價，喺美國消費力下降，同埋經濟前景唔明朗下，Tesla股價好難爆升。
KC又認為，市場對馬斯克及Tesla嘅睇法，會為公司帶嚟短線影響，中線更有衰退壓力，因為依家嘅消費周期唔太支持大額消費，長線嚟講，相信都係憧憬Tesla嘅自動駕駛技術發展或有「搶飲頭啖湯」嘅優勢。
