【Now財經台】網易(09999)昨日(15日)收市後派咗季度成績表，純利按年增長近35%，收入按年增長逾7%，派息13.5美仙。網易股價今日(16日)一度勁升16%，高見195.2元，係咪呢份季績畀到市場驚喜？
紅蟻資本投資總監李澤銘指，網易呢份季績的確有驚喜，主業遊戲業務收入按年增長12%，調整純利按年增長32%，收入亦好過預期。佢又話，其實網易都沉咗幾季，去年第2及第3季業績都向下，去年第4季就有少少復甦，但都唔算明顯，所以市場原本預期要再遲啲先見到真正復甦。
Alan又指，網易復甦都幾全面，唔止遊戲收入理想，用戶數量都上升，就連舊game如《第五人格》都再錄得增長，的確令人驚喜。佢估計，新game如《燕雲十六聲》及《漫威爭鋒》都應該可以帶動公司業績，因為呢啲係多平台遊戲，除咗手機，電腦都有得玩，雖然推出初期要燒錢做宣傳推廣，但只要成功吸納一班忠實玩家，之後賺錢就容易好多。
