【Now財經台】1個月拆息今日(23日)一度跌至0.58厘，市場認為，拆息回落同資金預備認購大型新股寧德時代(03750)有關，寧德時代上市後，新股接連有好表現，係咪代表認購寧德時代嘅資金有意接力抽其他新股？
冠域商業及經濟研究中心主任關焯照指，美國政策帶來嘅不確定性，令美元資產需求減弱，資金就會流入其他市場，包括亞洲區，香港只係其中一個受惠嘅市場，所以資金流入同香港本身嘅優勢冇關。
關博士又話，資金流入香港會推低拆息，有助市場資金流動性，以及帶動市場氣氛，但佢認為，流入香港嘅資金未必全部都同抽新股有關。
