【now.com財經】阿里巴巴(09988)今日都幾多消息，首先係《彭博》引述消息指，阿里擬減持之前成功「染藍」嘅中通快遞(02057)，但報道話仍未有定案，最終可能會放棄呢個減持計劃。
另一個消息就同本港零售市道有關，阿里旗下PapaHome淘寶家具實體店，繼今年2月喺尖沙咀中港城開咗首家店舖後，由於反應超熱烈，所以再下一城，將會開第2家店，今次會殺入另一個零售旺區銅鑼灣，消息指選址已經落實，市傳新店有3層，最快今年第4季開業。
雖然本港零售市道未明顯反彈，唔少商戶大呻生意難做，亦不時聽到結業消息，但PapaHome淘寶家具實體店今次極速喺旺區搵巨舖擴張，都可以為本港零售市場打返支強心針。
不過，阿里股價今日(28日)受壓，午後跌幅擴大，一度低見115.2元，跌2.3%。
