【Now財經台】中華銀科技(00515)股價今早(6日)平開後，早段一度升逾8%，高見0.5元，升上逾5年高位，但開市後半個鐘後開始倒跌，最多跌逾82%，低見0.081元，收市報0.082元，成交股數較過去100日平均大增逾82倍，全日成交金額逾1.6億元。
公司喺短短半年間已經歷大股東入主，派代表入局，再到辭職、減持，股價爆升後再洗倉式暴跌，股價早喺5月中已開始異動，股價半個月累升6倍，但冇成交配合，而喺股價炒起前半個月，行政總裁何秀媚宣布辭任，佢亦係大股東江鎮豪嘅一致行動人士，何秀媚辭任前1周，中央結算有大批股票轉倉去到申萬宏源(06806)，涉及逾2億股，相信同大股東有關，去到5月初，大股東開始沽貨，以每股0.071元沽出3000萬股，持股量由19%降至16%。
值得留意係，4月初空降嘅現任主席金洁，嚟咗公司冇幾耐大股東就有連串動作，原因耐人尋味，中華銀科技股價今日跌穿所有移動平均線，打回原形，要留意公司之後有冇咩公布。
