【Now財經台】華興資本控股(01911)股價連日異動，今早(9日)高開逾4%後，升幅急速擴大，一度大升逾17%，高見4.46元，升上近8個月高位，之後升幅收窄，收市報4.25元，升近12%，成交股數較過去100日平均增8倍。
華興上周五(5日)開市前公布，旗下基金早於2018年已投資上周四(5日)喺紐交所上市嘅穩定幣發行商Circle，華興股價上周五高開15%後，一度抽升22%，但收市倒跌2%，股價今日全日都保持升勢，但收市升幅收窄，可能同通告未有詳細披露投資詳情有關。
華興已連續3年蝕錢，以上周五收市價計，股價較2018年上市時「潛水」近90%。
睇返技術走勢，股價上周五嘗試突破250天線，最終得而復失，今日衝高，但連上周五高位都見唔到，今次Circle掛牌備受環球關注，雖然股價3日累升最多近3倍，但如果投資無法變現，華興股價似乎難有突破。
