【Now財經台】完美醫療(01830)昨晚(17日)發盈警後，股價今日(18日)插水，低開14%後，愈跌愈多，一度瀉26%，低見1.7元，跌到約4年半低位，暫時成交金額逾1700萬元，成交股數較過去100日同時段平均大增30倍。
集團預告截至3月底止全年，盈利將介乎2.05億至2.1億元，較去年同期跌逾30%，公司話，主要受香港消費者愈嚟愈鍾意去深圳或南韓等城市，買性價比高嘅美容服務等因素影響。
為應對呢個問題，集團同南韓醫美連鎖品牌Oracle簽咗獨家合作協議，引入醫美技術，集中推高性價比嘅醫美服務。
完美醫療股價今日大冧，反映市場仍對公司業務冇信心，盈利以至派息受壓可能只係一個開始，依家相對強弱指標(RSI)已去到超賣水平，短線可能有反彈，但喺業績未明顯好轉或冇利好消息前，要補返裂口就有難度。
