【Now財經台】截至早上11時止，過去1小時內《彭博》用戶搜尋量最多港股，依次為比亞迪股份(01211)、舜宇光學科技(02382)、華潤置地(01109)、中國平安(02318)及比亞迪電子(00285)。
比亞迪正面對內憂外患，外圍方面，美國繼續派「新關稅信」，最新向巴西徵收50%重關稅，會進一步影響比亞迪車廠布局，另一方面，早前經銷商囤積庫存嘅爆雷陰霾仲未消散，雖然集團已加強管理經銷商售價，但大和估計，穩定價格短線會影響銷售，由於市監局已召見車企表明要公平競爭，所以比亞迪難再以低價促銷，短線會影響內地銷售，加上「出海」布局有阻滯，股價短期係咪要繼續尋底？
椽盛資本投資總監曾永堅指，比亞迪股價反覆下跌，主要同「內捲」問題有關，尤其新能源車，相信有新車嘅車企已推出咗新車，未推嘅未必會喺呢兩三年推，由於內地汽車品牌好多，變相要打「生死戰」。
Jaseper指，雖然中央多次暗中會作出行政干預，避免「內捲」進一步惡化，但內地電動車供過於求，呢方面需時解決，相信比亞迪未來銷售增長會受影響，依家公司仲要加強管理經銷商售價，喺其他車企減價下，比亞迪能唔能夠維持銷售增長亦成疑。
