【now.com財經】繼早前接受《人民日報》訪問，大談泡泡瑪特(POP MART)(09992)及旗下皇牌IP Labubu「未來」後，創辦人王寧最新接受另一家官媒《央視》訪問，講到被質疑搞「飢餓營銷」、有荷里活電影公司想拍Labubu電影等。
對於Labubu喺全球引爆搶購潮，王寧認為，主要源於集團多年來對IP持續營運及創新嘅設計，又話公司唔止希望成為「中國迪士尼」，更要成為「世界嘅POP MART」。
佢又透露，唔少知名電影公司，包括有荷里活電影公司想拍Labubu電影，依家仲諗緊到底係自己做，還是同荷里活合作，同埋用咩方式做。
此外，每日喺網上都見到有bu粉話買唔到Labubu，怒轟貨源少到幾乎冇人買到，質疑泡泡瑪特玩「飢餓營銷」。王寧否認公司進行「飢餓營銷」，又指Labubu每月銷量高達1000萬隻，公司已盡力優化供應鏈，希望滿足市場需求。
泡泡瑪特股價今日(25日)反覆向下，午後一度低見248元，跌約2%。
