【Now財經台】味千(中國)(00538)發中期盈喜，刺激股價今早(11日)高開近6%後，升幅擴大，一度勁升近13%，高見0.96元，成交股數較過去100日平均大增13倍，暫時成交金額約280萬元。
味千主要收入主要來自內地餐廳，現時營業額佔整體銷售84%，反觀本港餐廳營運收益只佔約11%，集團依家加快數字化轉型，又積極推出創新產品，包括零售包裝食品，希望提升品牌價值及市場滲透率。
集團揸住近17億元現金，銀行借貸只係幾千萬元，公司已經幾年冇派中期息，但集團預告中期扭虧為盈，集團或會考慮恢復派中期息。
睇返技術走勢，味千股價今日借盈喜抽升，但高位獲利壓力唔細，加上上影線都好長，相對強弱指數(RSI)唔算超買，但喺0.91元水平都有一定阻力。
