【Now財經台】平安好醫生(01833)交咗一份靚業績，同業叮噹健康(09886)股價今日(21日)都好強勢，高開逾1%後，升幅一度擴大至逾22%，高見0.98元，暫時成交金額逾1500萬元，成交股數較過去100日同時段大增19倍。
集團8月初曾經出過通告，預告中期虧損收窄，但股價當時冇反應，雖然公司有講到會利用人工智能(AI)技術提供及優化服務，但可能市值細又蝕錢，對資金吸引力唔大，股價表現始終唔及平醫、阿里健康(00241)等。
叮噹健康股價今日喺大成交下抽升，可能係市場睇好線上醫療股前景，集團明日(22日)就會派中期成績表，留意業績之餘，亦要睇下公司對前景嘅看法，如果可以畀到一個較快嘅扭虧時間表，可能令資金有興趣進一步跟進。
叮噹健康暫時喺1元關口有阻力，雖然公司仲蝕緊錢，但揸住唔少現金，截至去年底有逾12億元，另外要留意上方有唔少蟹貨。
