【Now財經台】踏入第4季，投資市場變得波動，焦點一定係美國總統特朗普(Donald Trump)揚言要向中國貨品徵收100%關稅，但隔咗幾日，美財長貝森特(Scott Bessent)突然又話局勢已經緩和，到底中美貿易談判最終係咪可以傾掂數？
瑞銀財富管理投資總監辦公室大中華區股票主管李智穎指，中國態度強硬，反而美國就想傾，兩邊各自攞住自己嘅籌碼，中國係稀土，美國就係高端人工智能(AI)晶片，依家處於一個互相試探、談判嘅階段。
Eva又話，美國向中國貨品徵收100%關稅肯定唔會落實，一旦出現呢個情況，中美就會直接中斷貿易往來，佢估計，雙方會完成談判，關稅稅率介乎30%至40%，至於幾時可以達成共識就好難判斷，所以要繼續觀望。
睇返雙方嘅談判籌碼，李智穎指，中國打「稀土牌」一定會對美國造成限制，因為美方睇重稀土喺軍事上嘅用途，今次限制唔只出口，仲有稀土開發工具，反觀中方，雖然晶片唔夠高端，但AI運用已經慢慢成熟，對海外晶片嘅依賴已逐步減少，所以喺談判方面處於有利位置。
