【槓桿致勝】傳騰訊同Apple有搞作資金湧入好倉

【Now財經台】市傳騰訊控股(00700)同蘋果公司(Apple Inc.)傾緊，將人工智能(AI)模型整合至喺內地銷售嘅iPhone，帶挈騰訊股價今日(20日)有得升，亦係升幅較顯著嘅藍籌，昨日(19日)騰訊好淡倉都有資金坐貨，但對上兩日資金轉為流入騰訊熊證，今日資金部署情況又係點？

中信里昂股權衍生品銷售經理李佳原指，今日好倉即市資金流比昨日強勁，昨日資金博騰訊股價抽升就食糊，但騰訊股價過去幾個月走勢比較悶，單日升逾3%嘅日子唔多，所以昨日有較多資金趁高沽貨，至於淡友呢兩日傾向部署輪價低嘅PUT輪，約明年2月到期，價外約10%至15%，呢類PUT輪現價約2仙至3仙，實際槓桿約15倍。

佢又話，市場見到騰訊正股成交唔錯，開始睇好騰訊，今日多咗資金流入好倉，牛證即市成交亦多咗，CALL輪亦有資金流入。