【now.com財經】今朝揀咗隻恒指熊(51440)出嚟，本計劃等五分鐘圖Slow STC(14,3)上到超買時小注出場。但等咗成朝，有睇市嘅朋友都知今朝個市，如同植物人嘅心電圖一樣，極低波幅上落，喺作戰室戰友們都只係以幾格爬格仔嘅速度前進，及至上半場完場時，保歷加通道收窄到頂底線相差104點，悶到我家肥貓都瞓咗幾轉，恒指都仲瞓緊；肆問條Slow STC(14,3)又點有力爬得上超買水平入到隻(51440)。
下半場開市之後，指數有再向下再落多少少，五分鐘圖見指數雖然於保歷加通道橫行，但都比較大部份時間係處於保歷加下降通道，所以下半場返嚟指數稍稍再落之後，都見到保歷加通道口同步見稍稍拓闊，咁就啱啦，指數好大機會隨保歷加通道口拓闊又處於下降通道而向下再落，不過，今朝見嘅三線有少少唔同。
日線圖上嘅20天線同50天線位置無乜點變，都係喺20,900點呢個位，但係小時圖上嘅100小時線(小時圖100線)就稍稍上返啲啲，講緊係21,000點附近，其實都合理嘅，指數都橫行咗一個朝早，條100小時線因而稍稍抬高都係無可厚非嘅事，更何況即使今日出淡倉，都未有心理準備指數一下子向下再殺，大不了向下再殺多一層街貨咁大把。
話口未完，依家1點16分，恒指午後跌幅擴大至跌逾700點，21,100至21,199點嘅熊證全層死亡。今朝喺作戰室出淡倉捱到依家嘅戰友終於都見收成，只可惜咁樣再向下，就算(51440)等到Slow STC(14,3)再次上返超買水平時，隨時都到三點打後，跟手過夜，但去到呢啲位硬闖亦都唔係辦法，或者調整一下入市策略，進取嘅見五分鐘圖上指數上唔返100分鐘線(五分鐘圖20線)時，小注落場(51440)，睇下可唔可以捉得住淡倉嘅尾巴，爬下格仔。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入作戰室？Click呢度就得：https://www.patreon.com/cbbcwar
