【Now財經台】人民幣兌美元匯價噚日下晝由7.3水平衝上7.1水平，單日轉強逾1000點子，升值逾1.6%，單日升幅破紀錄。
人仔轉強，帶動美股嘅中國金龍指數連續第2日反彈，不過，東亞銀行財富管理部首席投資策略師李振豪指，內地及香港股市唔可能因為人仔彈高1日就扭轉劣勢，因為市場依家最關心係，中共新班子對未來管治方針嘅闡述，尤其係會唔會繼續堅持「動態清零」。佢估計，港股配合近日成交量回升，呢輪升市最多只能收復大跌市前嘅失地，即上返18300點水平。
此外，港股進入季績高峰期，其中為內銀股打頭陣嘅郵儲銀行(01658)喺A股有增資動作，Frank相信，其他同業都會跟隨。
