【Now財經台】恒生指數噚日強勢反彈，一舉收復20000關及250天線。騰訊控股(00700)派完成績表後，多家券商齊上調目標價，帶領中資科網股成升市火車頭，北水亦繼續掃騰訊，噚日淨流入逾14億元。
不過，博威環球資產管理金融首席分析師聶振邦認為，如果恒指今日及下星期一(27日)收市企唔穩20000點樓上，後市走勢仲未可以樂觀。
聶Sir續指，雖然騰訊有利好消息，包括噚日獲批內地遊戲版號，但始終股價基數大，現價約380元，距離400元水平嘅橫行區，只有約5%潛在升幅，因此，唔建議投資者現價追入，有貨嘅投資者亦可考慮等股價升至400元時減磅。
此外，今日騰訊股東會收到實物分派嘅美團(03690)股份，而美團今日收市後會出業績，聶Sir預期，美團將迎來一輪沽壓，喺150元水平有幾大阻力，有可能拖累恒指向下。
