【Now財經台】資金放完復活節長假返嚟炒股炒市，今日除咗內房股外，生物製藥股及醫藥外包股都係強勢板塊。一年一度、世界最大型癌症研究會議，美國癌症研究協會AACR年會就快召開，對創新藥股嚟講，好多時會趁舉行呢啲會議炒返轉，今次藥股會唔會趁AACR年會有炒作？
元宇證券投資總監林嘉麒指，炒氣氛係其中一個升因，此外，由於年會係面向買家，若個別藥企有突出產品喺年會亮相，都會令市場覺得有潛在價值。
今日其中1隻爆升藥股百濟神州(06160)，一度勁升逾13%，集團即將披露治療癌症嘅百澤安療法相關數據，已經喺內地上市，睇返去年業績，佔整體收入已經逾30%，未來有冇機會開拓埋海外市場？
KK就話，新藥喺會期公布，反映使用上將會更廣泛，加上肺癌產品價值含量高，收入佔比又高，的確對開拓海外市場有好大幫助。
