【now.com財經】噚日揀咗隻恒指熊(67540)，平均買入價為0.066元，一早已經Plan定用小時圖50線做目標，但同時間Set定以五分鐘圖第二級嘅「長方形」頂線作為量度線。
去到大約下半場1點30分左右，指數上破咗第二級嘅「長方形」頂線，觸發咗(67540)走貨訊號。而如果有留意到保歷加通道口走勢，或者啱咁Miss咗呢個moment的話，其實(67540)係唔需要執包伏走。一來小時圖有條150線(約19184點)，剛好頂住指數嘅高位；二來比多少少時間指數的話，喺18,180點出現咗「平頂」，而呢個位又同150小時線好近喎；三來，保歷加通道口都無拓闊過，Slow STC(14,3)兩線都上到靠近超買水平，觸頂向下嘅機會好大，隨時指數被推返落去第二級嘅「長方形」頂線以下水平。
不過，喺呢度Set咗個止蝕位喺邊就喺邊，觸發咗嚴守策略嘅大條件下，(67540)應當離場。按1點30分起計10分鐘作為走貨時間的話，即1點30分至1點40分，(67540)高低位做過0.068元/0.066元計，平均走貨價為0.067元，被嚇一嚇還好叫做有一格平返手續費，當無事發生。
之後發生咩事？之後咪指數向下再次落返去第二級嘅「長方形」底線，最後仲穿埋19,100點樓下，如果嗰啲位走嘅話，(67540)當然唔止和手續費咁簡單，但未去到嗰個位又點知個市係點行呢，嚴守策略總有佢嘅好處。
如果再揸埋過夜嘅話，今朝恒指開市跌逾200點應該絕對揭高(67540)嘅證價。不過，到正式開市後，指數即見低開高走。依家9點42分，跌幅一度縮窄到160幾點左右，但依家又再回返少少，咬住18,900點附近。
以今朝恒指開市價18,840點(暫時計亦都係今日低位)，已經將牛證首兩層街貨全數收回，當中包含咗一層過千張期指街貨，呢兩層夾埋有相當於1,324張期指。而將18,800至18,899點斬開一半以50點為一層的話，18,850至18,899點呢截其實都無埋，不過呢一截45張期指街貨，仲有一大截喺頭段。
本以為指數喺開市後會向下衝落去殺埋嗰40點收埋咗嘅707張期指街貨，不過，如前文所指指數開市後即見高走，走到依家9點53分，五分鐘圖生咗個「長方形」出嚟，至於小時圖呢，就等緊Slow STC(14,3)出超賣觸底。
恒指牛(67829)，收回價18,550點，槓桿約有33.8倍。Day Trade夠做嘅，作戰室偷步好倉應該出晒，事關未到10點已經見五分鐘圖「長方形」向上突破，只係要Alert住條向下中嘅10線。如果小時圖Slow STC(14,3)觸底的話，跌少啲嘅情況下出牛證其實都會有贏。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
