【now.com財經】噚晚未到半夜，出面勁雷勁雨，我被個雷嚇醒之後諗住起身睇下我家肥貓點樣，結果佢比我更得更冧，嚇親佢嘅唔係個雷，而係我無啦啦走近。
今朝個市都見行雷，ARD見恒指跌236點，報18,838點，同時亦見恒指牛熊證街貨圖上近牛街貨咁鬼死多，好難唔引指數向下行殺肥牛。
終於等到完U，恒指開市再向下瀉多377點，報18,697點，都確實係比大家(戰友s)心目中估嘅插得多，事關呢口不問價連日線圖畫咗唔知幾多次嘅「楔形」都一下子無埋。呢個裂口真係大到無朋友，過Weekend嘅淡倉應該今朝早開市唔止食All day breakfast 咁簡單。
至於上個星期五(8月11日)喺【輪證下半Part】提及過於上周二(8日)喺YT節目有講過嘅中移(00941)，其實喺上個星期五見佢已經破咗日線圖嘅「長方形」格局，當日推介嘅牛證(67967)基本上三日平均賺幅有16.67%。及至今日9點34分，見中移跌0.45%或0.3元，報65.69元，走勢上仍然企高於「長方形」頂線，(67967)如果Hold到依家，趁仲有正數閃人當然可以，如果唔係繼續用「長方形」頂線做量度線唔阻你，不過一早講明(67967)係玩幾日架咋。
嚟到依家9點46分，指數開市後一度跌459點，低見18,616點，作戰室第一注淡倉出動作為爬格仔嘅都應該爬完。以暫時恒指最低口價計，首四層牛證嗰相當於3,548張期指肯很定全數收回，至於18,600至18,699點嗰485張期指指，拆開以50點為一層的話，剛好見到18,650至18,699點有210張期指都係被收晒，即Total有3758張阿指掰，而餘下嘅18,600至18,649點呢部份應該有相當於275張期指嘅，不過以仲有16點生命值計，睇你加唔加埋上去啦。
假設，當18,600點呢層全層都無晒的話，變相指數今日將牛熊街貨嘅距離再次擘闊，今日雖然有新貼熊上市，唯以目前9點57分計，最貼價隻熊同現價都有逾500點差距，即係話指數又有好大機會開始靠住一邊近街貨嚟打，除非另一邊街貨出返貼價嘅，同時指數定一定，再將牛證距離拉返近。
恒指熊(51565)，收回價19,174點，就係最貼價嘅新上市熊證，同現價有逾520點距離，呢個收回價唔止佢一個嘅，喺同一收回價當中，(51565)為最高槓桿，有約33.91倍。
依家10點2分，指數再向日內新低出發，作戰室係仍然有戰友揸住淡倉在手，大家都望住18,500至18,599點嗰層重貨區，但小心嘅係指數行到依家呢個位，五分鐘圖嘅保歷加通道口已經無今朝拓得咁闊，所以小心指數同Slow STC(14,3)會出觸底，平均線未咁快到指數，唯有自己拉住線先，進取嘅到頂線出淡倉；安全嘅用番Slow STC(14,3)玩Swing唔反對。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
