【now.com財經】噚日用咗一個零鐘時間快速完成一趟淡倉嘅Day Trade，但亦都有講過如果大家喺下晝Keep住隻淡倉的話，留意住保歷加通道嘅走勢，而下半場見五分鐘圖上嘅保歷加通道都保持住向下運行嘅情況，只係喺下晝1點10分同3點15分上過中軸以上水平，呢兩個位是但一個作為走貨位的話，淡倉都有正數。
噚日老媽一抽二掕咁上咗嚟我屋企，佢話去銀行做啲嘢我諗係順便嘅，探我同我家肥貓就真係，事關佢左手一個5吋大蛋糕(話係我生日+我家老爺生日+我出院+佢想食)，右手就拎住提子、火龍果同哈密瓜。咁重又熱咁拎上嚟，我愛我媽❤。
今朝見恒指久違了嘅綠燈升市，雖然只係升18點，但都多多少少令手持貼價牛嘅好友拿拿聲喺開市後割禾青。今日恒指開市後一支「大陽燭」向上高衝到17,802點高位後，於五分鐘圖同步見到指數被條100線頂住，指數向下更見倒跌。不過到依家10點3分，等緊被cue做YT時已經見到指數升升跌跌，似乎今日有啲難搞。
向個股方向出發的話，我諗大家都仍然會針對住隻港交所(00388)，依家10點22分，港交所最低做過279.2元，同7月10日低位280元 & 5月31日低位282.2元出咗「三底」格局。暫時喺日線圖上見股價行出「十字星」，不過喺YT都照揀咗隻港交所淡倉出嚟，唔係博穿「三底」(佢穿我唔Mind架)，而係等佢稍為彈高之後先至再出手，呢個係要基於大市仍然無好消息刺激兼成交額仍然低迷嘅情況之下而出動。
日線圖上見港交所現價同10線仍然有一段距離，畫條「下降通道」比佢見股價處於「下降通道」低部，而頂線大約見290元左右，用返五分鐘圖做Swing Trade的話，即吼Slow STC(14,3)上到超買位時出淡倉可以，呢個向來都係Day Trade嘅玩法。但想比啲時間睇下「三底」係咪真係咁廢的話，亦都可以，Set定「下降通道」頂線唔過出動亦得。
港交熊(52415)，收回價313元，已經係市場上最貼價嘅港交熊證，同現價有約11%距離，槓桿有約7.92倍，YT都係推呢隻，袋住備用。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
