【now.com財經】坦白講自己都Feel到噚日盤感係差啲，上半場動作不多之後，下半場喺五分鐘圖上見指數無啦啦上破50同100線，諗住比注手痕+試溫水嘅注碼出動，誰不知撞正恒指變瘋婦，保歷加通道口無啦啦拓闊，諗住目標見返朝早高位17,800點附近，瘋婦應該未食藥，一下子飆到上17,900點樓上，作戰室兄弟們一早擺好好倉陣，同時亦準備見上影線就收工，呢一下大家唔貪心但食到飽，跟住等收市。
今朝恒指低開返28點，報17,762點，通常咁細嘅開市變幅我都係唔會點理佢，事關廢事連個市自己都未知想去邊嘅時侯出手，好容易會左一巴右一巴。
依家嚟到9點45分，恒指都唔知轉咗燈幾多次，都真係唔多想理佢。睇返噚日自己用恒指日線圖RSI嘅超賣水平同最近嗰兩次做比較，多謝老友古天后提醒(做完手術個人蠢啲係真架)，上年年底係港股RSI落到23之後彈得咁勁係因為憧憬復常，而對上一次係5月底RSI落到27之後，無咩憧憬下都只係出現彈散市。如今RSI再次低於30，同樣都未知有咩極利好消息出現(先唔會預美國停止加息，繼續爺爺嘅政策「條樓梯響咗九萬次都仲響緊」，或者爺爺要同孫女落老蘭「Gabu gabu jip jip, cam I cam I charm charm」所以唔係好得閒)，噚日一彈應該都只係比個位大家出淡倉啫。
嚟到依家9點52分，恒指目前跌57點，報17,733點，喺五分鐘圖上見指數喺窄窄嘅保歷加下降通道稍為向下運行中，正如前文所講，指數點數變幅唔大，保歷加通道口又點會拓闊？佢唔拓闊又問會有位比指數走？無位/唔夠位走又點會見到方向？
恒指嘥氣，繼續向個股出發。噚日揀咗隻港交所(00388)嘅熊證(52415)，話比多一日時間佢。明白嘅，約279至281元呢個範圍嘅「三底」係強嘅，見到輪證資金流過去五日有2,451萬元資金流入港交好倉都知發生咩事。而今日見佢暫時低位做過280元，雖然算是稍高於噚日低位，但技術上仍然方守「三底」水平，萬一恒指唔生性，「三底」硬如搽滿神油都未必頂得住。
再等下先，佢唔急我做乜要急。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
